عتابا ... وشرفو يا شباب/ بنات

لحد هلق ما فضي كاسي وانصفى
العتابا اللـــي رح قولا بدّي إنصفا
نذرا عليي انراق دهــري وانصفى
لجعل حياتي قربكم كيف وهنـــــــا
............................
يارب جمّع لا تفرّق شملنا

الكاس لـــو صفي زيد ثلثيه عـرق
وخلي العتابا تتغنى ع ناي وع رق
بمحبتنا ما نميز بين جنس وعرق
والصداقـة محبة شاهد ع أفعالــنـا
..................
يارب جمّـع لا تفرّق شملنا

ياخيي ضيعتي إحساس بحبي وشعري
وع فرقتها بغربتي زاد شيبي وشعري
برسل لحبابي كتاب من نثري وشعري
وبخلــي الشعر يخبركـم عن أحوالنـا
...............
يارب جمّــــع ولا تفـــرّق شملنا

_________________

عذارى البيض بحبّي قـــــــــــــــديمات
وياما مشت عدروبن قـُـــــــــــــديمات
ماواحد بالبشر ياعالم قــــــــدّي..مات
وقـــــــد ما صوّبوا عليّ الهـــــــــداب
.........................
يارب جمّـــــــــــــع لا تفـــــــــرّق شملنا

يامحلا البيض لو مشين حنجلـي
يشبهن غزال الريــم بكل حنجلي
ياشارب الكاس خلي ال حن جلي
القلـب لو حــن مابطفيه الشراب
............
يارب جمّــــع لا تفـرّق شملنا

_________________

كأس شعار العتابا والمحبين
...............
مسيت عالسمرة وكان الليـــل حــالك
ومن بين شفافها سألتني كيف حالك
قلتها ياسمرة لاتشوفي عليي حــالك
الحارة ضيقة ونحــن بنعرف بعضنا
..............
يارب جمّــع لا تفــرّق شملنا

ياسمرة ...ليش ماشفقتي لحالي
أنا اللي عم واجه هواكي لحالي
عا ظلمك يادني شابت لحا لـي
أرحميني بس من ساعة عذاب
..................
يارب جمّــع لا تفــرّق شملنا

ياجـورج السمر عليك شافوا حالن
وياريت يكـــــــون حالك من حالـن
حبابك الـ ماشفقوا عليك والله حلن
يمدوا خيوط الوصل لقلوب الحباب
.............
يارب جمّــع لا تفــرّق شملنا

_________________

ياريــــم السمر ناطرلك كرامــي
محبتك بالقلـب فيها عزة وكرامة
مثل مابسجل أهداف نادي الكرامي
أنا بسجل نقاط ع شعار العــتاب
...............
يارب جمّــع لا تفــرّق شملنا

شاعر وعم تسجل أهداف بـالكرامي
أنا شاعر مش شايفك بمرامي كرامي
وإن كان بالعتابا لك عــزة وكرامة
تعال ت خبرك عن ميدالياتي بالذهب
...............
ياحكم سجل بطاقات صفر ع شعارنا